Wie gaan dit wees…?

Oktober 18, 2007

 Ek ken tog iemand wat vir Bakkies regtig ken!  Whê!

Ons het hierdie week al meer geskrum as wat Percy sy kuif reg druk in ‘n hele seisoen!  Magtig!  Dit voel asof ek en Bakkies by die heup gejoin is!  Hy staan al glads op om saam te gaan as ek wil kamer verlaat…

Soos ‘n ou seker kan verwag, het die Bleekbene se pers al hierdie week die trofeekas daar op Twickenham oopgesluit en die laaste vier jaar se stof begin afvee om plek te maak vir die trofee wat oppad is.  Sjym.  Het jy nou al gedink hoe sal ‘n Ingelsman gedonner raak as hy daai bekertjie by Madiba probeer dêps!  As julle dink ons het die Engelse gatte in die Boere-Oorlog geskop, moet julle hierdie fight kom kyk – dit gaan nie mooi wees nie!  En die Engelse Kanaal kan byvoorbaat herdoop word na Bloedrivier!

Ek kry nogal die Argentyne jammer.  Sjym, hulle ou kapteintjie se woorde het my bietjie sleg laat voel Sondagaand.  “Our World Cup is over…”  Kan nie lekker wees nie.  Om met daardie gemoedstemming nog die Hane weer ‘n slag aan te pak, kan ook nie goed wees nie.  En dit gaan ‘n omgekrapte troppie hoenders wees.  Die Pumas het immers gesorg vir die begin van die einde van die gashere se drome.  Anders as al die wêreldoorloë, dink ek nie die Fransmanne gaan hierdie keer weer op hulle dinges kry nie.  Ek voorspel ‘n weghol-oorwinning!

Terug by Saterdag…  Wie gaan dit wees?  Enige voorspellings?  Al wat ek weet, is dat Os en Madiba nogal iets in gemeen het – altwee gaan die Goue Beker TWEE keer in hulle lewens lig!

Laat waai met die rugbyraai!  En bid.  En hou julle duime was.  En asseblief:  moenie Saterdag te veel drink nie – ons is oppad huistoe, en sal ook nog ‘n bietjie sjampanje wil hê!

En BAIE dankie vir julle ondersteuning!


‘n Geskiedenisles en rugbyspoke

Oktober 9, 2007

Voor ek enigiets oor die naweek se rugby sê: ‘n stukkie geskiedenis…

Donkiejare terug, in 1949, het die grootkoppe van All Blacks-rugby ‘n baie snaakse ding aangevang. Hulle het hulle seisoen so beplan dat die magtige All Blacks gelyktydig, op een dag, teen die Assies en die Springbokke sou speel. Daar is ‘n toergroep gekies vir ‘n reeks van vier wedstryde teen Suid-Afrika, sowel as ‘n span wat teen die Aussies sou gaan speel vir die Bledisloe Cup. So besluit, so gedaan…

En toe, op die 3de September 1949, draf die All Blacks se “derde span” teen die Aussies op in Wellington. En soos te wagte kan wees, klap die Aussies die Kiwis daardie dag met 11-6. En die magtige Silwervaring verloor die Bledisloe Cup. En soos die son weswaarts trek, raak dit toe tyd vir die All Blacks om hulle man te staan teen die Bokke, daar in Durban. Tagtig minute later, en die telling is 9-3, in die guns van die Springbokke. Vir die eerste keer in die geskiedenis van All Black-rugby, verloor hulle twee games op een dag. Een Kiwi-kommentator het dit ‘n “extraordinary day of humiliation” genoem. Wie sou nie?!

Terug by die naweek se rugby… Vyf weke terug daag die All Blacks in Frankryk op, na ‘n wonderlike drie jaar van voorbereiding. So wonderlik, dat hulle twee spanne het wat enige dag die res van die rugbywêreld kan aanvat. Let wel – alweer twee spanne. En hulle knoop toe al wat ‘n span is se sterte in die groepswedstryde. Sonder moeite.

En toe breek Saterdag 6 Oktober aan. Die All Blacks is vuurwarm favourites, en goed oppad eindstryd toe. Al wat tussen hulle en ‘n halfeindstryd staan, is die Franse Hane. No problem. Die wedstryd word nogals in Cardiff gespeel. En wat toe hier gebeur, word baie mooi deur Bakkies as volg verduidelik:

“Sien, Gabba, die ding staan so. Die All Blacks, met hulle haka en Maori-agtergrond, is eintlik maar ‘n vreeslike bygelowige spulletjie. Hulle glo verskriklik in spoke. Way back then in 1987, met die eerste Wêreldbeker, was daar nie ‘n Wêreldbeker-verlede wat by hulle kon spook nie. Die wat hulle toe die koppie kon wen. Maar kom ’91, toe spook die glorie van ’87 by hulle, en hulle sien hulle ghwarre. In ’95 was die toernooi in Suid-Afrika, en elke Suid-Afrikaner sal vir jou kan vertel hoe spook ons ou landjie. En elke tweede spook se naam is Suzie. En toe jaag Suzie van Jo’burg die spulletjie mos op hol. En Madiba wen die ou koppie.”
“In ’99 is daar toe so baie spookstories in omloop, die All Blacks het nooit ‘n kat se kans gestaan nie, en in ’03 het hulle weer te naby aan hulle eie eilandjie gespeel, so toe spook al hulle voorvaders by hulle, en weereens duik hulle in die bollie. Hierdie jaar het hulle sonder enige spoke opgedaag, maar toe hulle die haka doen, kom spook die Hoenders in hulle gesigte met ’99 se spoke. Eindresultaat: hulle soek alweer ‘n nuwe coach!”

Aldus Bakkies. Terug by die twee spanne van die All Blacks. Hulle laat dink my eerder aan die ouens daar uit Bakkies se wêreld. Jy weet mos – daai 1-2-3 manne. Een liter brandy, twee liter Coke en drie-liter Ford. Net met ‘n klein verskilletjie. 2-1-0. Twee spanne. Een nasie. Zero World Cup!

En dan was daar die Aussies. Shym. Om te dink hulle bring vir arme Larkham saam vir die semi’s en final, en dan moet hy op die pawiljoen sit en huil omdat sy maatjies hom nie ‘n speelkans gegee het nie. Dit moet nogal bollie wees.

TinkerBelle is die Groene hier in ons span. Baie ge-concern met global warming en sulke goed. Hy is net bekommerd oor die drie eilandspannetjies wat moet terugkruip daar na waar hulle vandaan kom. Hy wou weet of hulle darem almal saam op een vliegtuig sal terugvlieg, om sodoende hulle “carbon footprint” so klein as moontlik te hou. Ek verstaan nie lekker van footprints nie, maar dok Jannie het dit vir my verduidelik. Hy sê as ‘n koei poep stel dit metaangas vry, en dit besoedel die lug. BobTong sê dan moet ons nie bekommerd wees oor die vliegtuig se poep nie, maar eerder oor al die poepe wat die eilanders op die rugbyveld gelos het. Dit was baie meer. Bakkies sê dit het vir hom meer gelyk na bollie as poep. Bakkies weet van die verskil tussen ‘n poep en ‘n bollie. Hy’s ‘n plumber, jy weet.

Feit van die saak: daar was agt, nou’s daar vier. En Bok se kind is nog in die mix! Saterdag wei die Hoenders in die Roostuin, en Sondag is daar ‘n troppie Poemas wat skielik ‘n aptyt ontwikkel het vir Springbokvleis. En na die afgelope naweek gaan ek geen voorspellings waag nie. Paddy Power en die ander bookies het hoeka laat weet dat hulle nie meer van my dienste gebruik sal maak nie. Hulle reken my voorspellings is soos die Hoenders se rugby en die Rose se bier – bollierig.

Ek sal egter een voorspelling waag, en hierop kan julle maar bank. In die finaal gaan ons kattermaai onder die Hoenders of die Rose! Hou maar net dop!

RUGBYRAAI-WENNERS

My admin-mannetjie is uiteindelik weer op sy pos, en hier is die wenners van die laaste twee rugbyraaie:

BOKKE vs YANKS: BOERINBALLINGSKAP (67 – 15) (Anel het naby gekom met haar 65 – 17, maar ons het besluit om dit vir Boer te gee omdat hy een van die tellings raak voorspel het.)

BOKKE vs FIJI: BOENDOE (38 – 21)

Baie geluk, julle twee! Nie te sleg nie! Die admin-mannetjie sal met julle kontak maak! Hierdie naweek is dit ons teen die klomp Argentyne – julle kan laat waai met daai voorspellings!

Groete tot ‘n volgende keer!


Gekielhaal!

Oktober 3, 2007

Wat ‘n naweek!

Skielik is daar 31 Walliesers wat werk soek – enige werk behalwe rugby – want rugby kan hulle duidelik nie speel of afrig nie… Nogal hartseer, nie waar nie. Die arme coach, Gareth Jones, het skaars die kleedkamer gehaal na die wedstryd, toe staan sy kantoorinhoud al op die sypaadjie. Hierdie steenkoolmyners vatikaki! En imagine jy lyk soos hulle kaptein – hoe sou jy gevoel het?

Werkloos en tandloos… Die lewe is maar partymaal ekstra ongeskik met party mense… Ons het self nie die mooiste kaptein nie, maar woord op straat is dat die instaan-kapteine darem so nou en dan ‘n paar knieë lam maak. *wink wink* If you know what I mean!

By die Iere gaan dit seker nie veel beter nie – die enigste ou wat daar seker is van sy werk is die coach, en dit net omdat hy slim genoeg was om sy kontrak te verleng voor hulle op hulle herrie gekry het! Dalk moet die Iere oorweeg om ‘n paar Argentyne in te voer – ten minste wil hulle rugby speel! Volgens my onbeskeie opinie moes die heer O’ Driscoll sy emosies vir homself gehou het toe hy daardie poksie van hom gaan druk het. Sy uittartery het net daai klomp Argentyne bedonnerd gemaak! En die resultaat is verewig op die scoreboard!

Hier in ons kamp gaan dit voor die wind. Die stutte knor ‘n bietjie met seer knieë, maar coach het vir dr Jannie du Plessis laat kom om die spulletjie te kom gesond dokter. ‘n Ekstra voordeel is natuurlik die feit dat hyself nie te onaardig druk op stut nie, en dus sommer sy tokse ook moes saambring. Persoonlik sou ek natuurlik vir Richard Bands laat kom het (Bloubul, jy weet…!), maar my stem tel nie (ek’s net ‘n instaan-kaptein, ‘n sexy een…) Bismarck is baie in sy skik – nou kan hy vir sy ouboet wys die girls is regtig so mooi soos hy in sy briewe huistoe gespog het. Die seuns darem… Ek dink die stutte eet te veel, die dat hulle knieë inkonk. Tot ou Bakkies ly honger – hy het glads al gewig verloor…

MY VOORSPELLINGS VIR DIE KOMENDE NAWEEK

Hier gaan ek bietjie my bek rek! En vir die beste hoop! Eerste wedstryd: Australië teen die Bleekbene. No contest! Die Aussies gaan hulle gatte goed skop! Met ten minste 20 punte.

All Blacks teen die Hane: weet julle hoe het ek gebid vir hierdie situasie! Ek gaan soen sommer ‘n paar Argentyne! Dit gaan ‘n riller wees, want Les Blues sal nooit die skande oorleef as hulle nou reeds uitgeskakel word nie. Feit van die saak: All Blacks met tien punte!

Argentinië teen Skotland: No contest! Alweer! Die Britse spanne is te akkies hierdie jaar om ‘n duik in ‘n marshmallow te maak, wat wou die Poemas opdons! Argentinië met 20 punte!

Bokke teen die Eilanders: NO COMMENT! Maar bly ingeskakel vir volgende week se halfeindstryd: Bokke vs Poemas!

Nou – die rugbyraai! Ek het ‘n paar e-mails van angstige wenners gekry wat wonder wanneer hulle hulle pryse gaan kry. Goeie nuus! Ons borg het aangedui dat die prysgeld Vrydag elektronies in elkeen se bankrekening inbetaal sal word. Julle moet asseblief julle bankbesonderhede vir my e-mail, dan sal ek dit weer vir hulle aanstuur. Die volgende rugbyraaie se pryse sal betaal en gestuur word na afloop van die Wêreldbeker. Happy? Happy!

Ek het nog nie die uitslag van die SA vs VSA rugbyraai gekry nie – die mannetjie doen tot vandag toe nog een of ander valskermkursus. Sal dit pos sodra ek dit het. OK? OK!

Nou ja toe – groete uit ‘n klammerige Frankryk! Ek hoop dit reen lekker daar by julle ook!

O ja! Hier’s die nuwe rugbyraai! SA teen die Island Stylers! Go for gold!

PS: Ek kan nie elke dag blog nie – ek het ‘n World Cup om te wen, verdomp! Maar ek en ou maergat (Bakkies) geniet dit om te sien wat julle als te sê het. So sê ‘n slag iets – moenie net gulsig wees oor die prysgeld nie! Byvoorbeeld: wie’s die sexyste: Ou tamatieboude of Bakkies? en die slimste? Ou tamatieboude of… uhm… of… Sê julle maar!


Klein skippies!

September 25, 2007

Waaroor gaan almal tog so tekere?!

‘n Mens sou sweer ons het êrens ‘n Bokkop verloor soos wat die koerante in Suid-Afrika aangaan oor Saterdag se uitstappie teen die ouens van Tonga. Dit was close en alles, maar ons was nooit buite beheer nie, was ons? In elk geval nie gedurende die tweede helfte nie.

Ek moet erken dat die beginspan nie juis gelyk het na ‘n Springboktrop wat later uit die Gouebeker gaan vreet nie, maar julle moet onthou dat twee dinge op die dag teen ons getel het. Eerstens is dit moeilik om die ouens opge-charge te kry vir ‘n wedstryd teen Tonga, en tweedens was dit die sg B-span wat uitgedraf het. Moeilik om dan wonderwerke te verwag. Sorry Bob…

Coach het reeds besluit die A-span sal Sondag die Yanks se sterte gaan knoop, so niemand hoef meer in vrees te lewe nie. Anyway, ons het behoorlik met Samoa en die Bleeksiele afgereken, so niemand kan sê die span voldoen nie aan die verwagtinge nie. Persoonlik dink ek ons is mooi op koers, en Saterdag was net ‘n reminder dat mens enigiets in hierdie toernooi moet verwag.

By the way – het enigiemand opgelet dat die Springbokke die eerste span was wat plek bespreek het in die kwarteindstryde? Ek dink dis ‘n goeie teken. Hieronder het ek vir julle ‘n samevatting van die verloop van sake tot dusver ingesit, met al die uitslae en goodies, sowel as die stand van sake in die onderskeie groepe.

 

 

Die Bleeksiele is in vir die game van hulle misrabele lewens komende Vrydag. Tonga het bloed geruik, en hulle gaan soos ‘n pak honger wolwe wees. Ek weet nie of die liewe Sir hulle uit daai gemors geskop gaan kry nie. Kan jy imagine die kampioene maak nie die volgende rondte nie?! Wat ‘n geween en ‘n gekners van tande – maar ook net op die Queen se Klip! In ons groep is Samoa die groot teleurstelling – iets soos Pamela Anderson in ‘n Voortrekker-rok…

In Groep B sal die verdomde Aussies en die steenkoolmyners gemaklik deurgaan, terwyl die All Blacks en die whisky-makers Groep C sal top. In Groep D is die chaos heerlik om te aanskou. Die volgende belangrike game is die Hane teen die manne van Georgia. Die Hane moet met ‘n lekker groot punteverskil wen, en vier drieë druk vir ‘n bonuspunt, om hulself in die run te hou vir eerste plek in die Groep. Daarna vat die Pumas en die Iere mekaar. Wen die Pumas, eindig hulle bo-aan die groep, en moet die Fransmanne hulle lywe begin vet smeer vir die All Blacks – in Cardiff! Nie iets wat die arme gashere aan gedink het voordat hierdie toernooi begin het nie…

Ek hoop en bid vir ‘n All Black/Frankryk – wedstryd! Wie ookal daar wen, sal die hele World Cup op sy kop keer. CHAOS! En soos Bakkies sê: dis beter om onder die radar te vlieg – veral wanneer die kakka die fên strike! Plumbers weet van kakka, so ek stem saam met hom.

Ander nuus is natuurlik die beweringe rondom KleinSwys se knibbel aan Sefa Vaka. Dalk het die outjie dit letterlik opgeneem toe Coach ons opgestuur het met die opdrag “gaan verskeur hulle”. Tyd sal leer wat die uitkoms van hierdie happie gaan wees, maar met ‘n moontlike straf van ses maande tot drie jaar, klink dit meer na ‘n gewapende roof op ‘n Kentucky, as net ‘n klein proe-slaggie aan ‘n opponent…

Coach het vanoggend gesê hy gaan voortaan persoonlik seker maak almal eet genoeg voor ‘n wedstryd, sodat die honger hulle nie weer oorval gedurende ‘n game nie. Bakkies reken (met ‘n moerse grynslag!) hyself sal dan nooit betyds by die game opdaag nie. Ek het voorgestel ons bedien ‘n vinger-ete gedurende halftyd in die kleedkamers. Bakkies het toe amptelik aansoek gedoen dat halftyd tot twintig minute verleng word… Plumbers darem…

Die rugbyraai vir die wedstryd teen die Yanks is oop! Kliek hier onder! Ek sal net nou die wenner van die vorige raai aankondig – Bakkies sukkel nog met die somme!


So hittete of ek het my ghwar gesien…

September 20, 2007

 

Fake Vic vra nederig omverskoning vir sy afwesigheid die laaste paar dae. Die geveg was bloedig, met tye amper mismoedig, maar die virus is oorwin…

Ja, jammer vir die doodse stilte, maar dis pragtig om te sien julle outjies en vroutjies het kop gehou en aangehou met die rugbyraai!

Coach was so bekommerd oor my, hy gaan staan en kies toe sommer vir KleinGys op heelagter! Praat van ingedagte! Dis nou nie asof ons reeds vir JP en Monty en KleinSwys het wat kan heelagter speel nie… Maar dit is onbedag en verkeerd van my om die wysneuse se besluite in twyfel te trek.

BobTong draf Saterdag voor, die blêddie Nataller is alweer op die bank en – berge bedek my! – ek ook! Ek dink tog ek is maar net daar omdat die Nataller niks behoorlik sonder my en Bakkies kan doen nie – vandaar Bakkies se teenwoordigheid in die beginspan. Duh! Jy kan nie twee slotte op die bank kies nie!

Ek is nogal opgewonde oor Wayne se insluiting op senter, met Wynand op sy buitekant. Bul-senters! Need I remind you dat ons vroeër vanjaar die Super 13 (+ Stormers) gewen het?! So vir al julle Natallers – sharrap! Ons man is beter as julle s’n!

Ek moet sê Tonga het my beïndruk met hulle (naelskraapse) oorwinning oor die Lima-clan. Kan jy nou meer! Hier rond giggel die mense vir coach se spankeuse vir Saterdag se wedstryd, en uit onkunde beweer hulle die Bok is in vir ‘n pakslae. Haha! Place your bets! Ons gaan daai outjies se sterte knoop! Het enige iemand opgelet wie en wat sit op die bank?! (Behalwe natuurlik ou Splinterboude…)

Tog jammer van die Samoane wat verloor het – dit gee die Bleekbene nou weer ‘n effense kans om die kwarteindstryde te haal, en ek het so uitgesien daarna om hulle te sien verkas terug na die Queen se Klip toe… Het julle geweet jy kan hier van Parys af ry tot op die Klip? As ek die “old farts” is, laat ek hulle terug hike omdat hulle so bollie is/was!

* * * * * * * * * * * * * *

Ek sien die BlommeBokke doen glad nie te sleg in die Twenty20-reeks daar in goeie SA nie! Mooi man! Ek is egter oortuig daarvan dat ons twee sportsoorte beter af sal wees wanneer ons eendag ontslae raak van afstammelinge van die Titanic-kaptein. Hy was mos ook ‘n Smith… Ek hoop maar net hierdie huidige S’e jump eerste ship, en nie laaste nie…

En weereens het die Bleekbene sleg op hulle dinges gekry! Nogal in krieket! Tog interessant hoe “die vaders van die game” in hulle eie sportsoorte op hulle neuse moet kyk! Maar met ons gaan dit party dae nie veel beter nie… Altwee kapteins is semi-beseer, heeltemal-useless, maar speel moet hulle speel. Ek vermoed die Smith-clan het groot connections met die Mafia of die regering of iemand – dit maak net sin…

* * * * * * * * * * * * * *

RUGBYRAAI: BOKKE vs TONGA

Hou aan tellings pos vir die rugbyraai! Kliek op die prentjie hieronder en laat waai met daai tellings. Die tellings wat reeds gepos is, sal ook hier verskyn. Groete tot volgende keer – die nurse reken ek moet myself nie ooreis nie…


Gatskop en Opskop

September 15, 2007

Die enigste verskil tussen Suid-Afrikaanse brandewyn en Franse brandewyn, is dat die babbelaskopseer duurder was om te verwerf!

NOU WAT Sê JULLE NOU???!!!

Het ons gat geskop, of het ons gat geskop?!  Ek sal julle sê:  ons het die sogenaamde champs se gatte vol ou Springbokskoene geskop!  En ek sal verstaan as daar vandag ‘n kollektiewe babbelaswaas oor die hele Suid-Afrika hang!

Ek het met ‘n doel nie geblog voor gisteraand se wedstryd nie.  Die fokus in ons kamp was net te intens, en niks en niemand mag daarmee interfere het nie.  Maar nou het julle gesien hoekom – ons het die Kakies goed gas gegee!

Soos ek hier sit (êrens tussen “nog onder die prop” en ‘n kopseer wat ek nie aan rugby kan toeskryf nie) weergalm Olé Olé nog deur die hotelgange.  In die strate, in die kroeë, oral…  Olé Olé!  Dis asof gisteraand die final was!

Iemand het hier opgemerk gisteraand se telling is die All Gold-telling.  Skerp, Jo-Ann!  36! Groen tamatiesous!  Om NUL te kry in ‘n rugbywedstryd is soos om uit te pass op jou huweliksnag – jy was daar maar jy het nie saamgespeel nie!   Dis selfs slegter as ‘n mes by ‘n gun fight!

Die enigste ou in die Springbokgroep wat nie heeltemal indulge het in gisteraand se feesvieringe nie, is ou KleinSchalk.  Sjym…  Hy is nou nog naar oor sy skorsing.  En nee – nie omdat hy vir twee wedstryde geskors is nie – omdat dit nie meer vier is nie!  Die ou het na die eerste skorsing gegaan en vir hom een van hierdie Franse poegies gekoop om die Franse wynlande mee plat te ry en al die wynplase te besoek.  Nou gaan hy net by die helfte van sy toerplan uitkom…  Bakkies reken hy moes dalk maar ‘n poegie gehuur het, want die mark vir tweedehandse poegies is glo nie te waffers nie.  Dit het KleinSchalk net verder depro gemaak…

Ek het ‘n voëltjie hoor fluit die Lima-clan gaan die Bleekbene probeer ore aansit.  Hulle reken hulle kan die Poms se gatte skop en sodoende ‘n plekkie in die kwarteindstryde bespreek.  Dit sal nou vir jou ‘n ding wees.  Dalk moet Lima sy Petoors-duikslag op Sir JW probeer.  So fragile soos wat die Sir deesdae is, behoort ou Brian sonder enige skade daarvan af te kom.  Ek sal net voorstel hulle hou ‘n goeie neuro-chirurg op standby, in case hy die Sir se kop van sy lyf vervreem…  Bakkies sê hy sal assisteer, want hy weet wat om te doen as k*k spat.  Plumbers is sulke vuilbekke!

Coach het êrens laasnag gesê hy oorweeg om al ons spelers te rus vir die volgende wedstryd, en die support staff ‘n kans te gee om hulle Springbokbaadjies te verdien.  Zola sal glo op skrumskakel uitdraf, Ozzie-Eddie sal op stut sak, ensovoorts.  Hy sê ons is nou so ver voor in ons groep, dit lyk asof ons agter is.  Die span sal blykbaar more aangekondig word – dis een van die IRB se reëls dat die afrigter nugter moet wees wanneer hy sy span aankondig.  Ons hoop om teen daardie tyd iemand te hê wat aan die nugter-vereiste sal voldoen…

Baie geluk aan TINA!  Sy is die wenner van R500-00 kontant!  En dankie vir Wanda wat dit uitge-figure het – ek sou so bietjie sukkel, want dit het vir my gelyk Tina het ‘n telling van 333666 — 777 voorspel.  Ouch…  Dalk herstel my sig nog later vandag…  Dan kan ek my Proheps begin soek…


Rugbyraai: SA v ENGELAND

September 10, 2007

Die nuwe rugbyraai is amptelik aan die gang. Kliek op die prentjie en los jou telling!