Wie gaan dit wees…?

Oktober 18, 2007

 Ek ken tog iemand wat vir Bakkies regtig ken!  Whê!

Ons het hierdie week al meer geskrum as wat Percy sy kuif reg druk in ‘n hele seisoen!  Magtig!  Dit voel asof ek en Bakkies by die heup gejoin is!  Hy staan al glads op om saam te gaan as ek wil kamer verlaat…

Soos ‘n ou seker kan verwag, het die Bleekbene se pers al hierdie week die trofeekas daar op Twickenham oopgesluit en die laaste vier jaar se stof begin afvee om plek te maak vir die trofee wat oppad is.  Sjym.  Het jy nou al gedink hoe sal ‘n Ingelsman gedonner raak as hy daai bekertjie by Madiba probeer dêps!  As julle dink ons het die Engelse gatte in die Boere-Oorlog geskop, moet julle hierdie fight kom kyk – dit gaan nie mooi wees nie!  En die Engelse Kanaal kan byvoorbaat herdoop word na Bloedrivier!

Ek kry nogal die Argentyne jammer.  Sjym, hulle ou kapteintjie se woorde het my bietjie sleg laat voel Sondagaand.  “Our World Cup is over…”  Kan nie lekker wees nie.  Om met daardie gemoedstemming nog die Hane weer ‘n slag aan te pak, kan ook nie goed wees nie.  En dit gaan ‘n omgekrapte troppie hoenders wees.  Die Pumas het immers gesorg vir die begin van die einde van die gashere se drome.  Anders as al die wêreldoorloë, dink ek nie die Fransmanne gaan hierdie keer weer op hulle dinges kry nie.  Ek voorspel ‘n weghol-oorwinning!

Terug by Saterdag…  Wie gaan dit wees?  Enige voorspellings?  Al wat ek weet, is dat Os en Madiba nogal iets in gemeen het – altwee gaan die Goue Beker TWEE keer in hulle lewens lig!

Laat waai met die rugbyraai!  En bid.  En hou julle duime was.  En asseblief:  moenie Saterdag te veel drink nie – ons is oppad huistoe, en sal ook nog ‘n bietjie sjampanje wil hê!

En BAIE dankie vir julle ondersteuning!


Soos daai Arno-outjie sê… The time is now!

September 5, 2007

Parrrrhee. Dit is Frans vir Parys. Die Engelse sê sommer Pêrris. Soos daai klein Hilton-slet. Net groter en leliker. Maar die mense hier bestuur net so sleg, en drink selfs meer. Dis waar ons onsself bevind. In romantiese Parrrhee. Maar ons is nie hier vir vry nie, ons is hier vir rugby. World Cup nogal!

Ja! Na ‘n lekker bedrywige week by die huis, is dit uiteindelik tyd vir die Ware Jacob. Dit waarvoor elke rugbyspeler lewe. Die Wêreldbeker! Man, maar ons is opgewonde. KleinGys en KleinSwys giggel onophoudelik. Ek probeer uitmaak of dit van opgewondenheid vir rugby is, of omdat nie een van die girls wat ons raakloop geld het vir ‘n bra nie. Sjym. En met die koue hier is dit nogal ‘n gesig…

Voordat ek enigsins verder gaan: GROOT NUUS!

 

 

KOMPETISIE-TYD!!!

 

Ons rugbyraai-kompetisie is amptelik aan die gang! Tot dusver het ons R6000-00 in kontant, twee televisiestelle en ‘n getekende Bloubul-rugbytrui om weg te gee! Ennnn…. die kans is baie goed dat die pryse nog meer sal raak binne die volgende paar dae!

Baie dankie vir Wimpie en Platkop vir hulle bydraes – julle ouens is GREAT! Wimpie (van Oos-Rand Stereo) het ‘n verdere gratis advertensiepakket ter waarde van duisende rande aangebied vir enige borg wat bereid is om vir ons ‘n paar groot pryse te borg. Dus, as jy vir ‘n company werk wat mal is oor rugby, nog ‘n paar RRR’e los het in die sponsorship budget, en op die koop toe gratis lugtyd wil verdien, kontak vir my of Wimpie! Vandag nog!

Vir starters gaan daar R500-00 wees vir die persoon wat die Springbokke se telling in elkeen van hul vier groepswedstryde reg voorspel. R500-00!!! Per wedstryd!!! Dink net hoeveel bier jy daarmee kan koop en op-stock vir die finaal! R500-00!!! Bakkies sê dis meer as wat ‘n goeie plumber in ‘n half-uur verdien. En in ‘n half-uur kan uitdrink. Maar net-net. Hy sal weet…

Al wat jy hoef te doen, is om jou voorspelling as ‘n comment te los, met ‘n geldige e-mail adres daarby, en siedaar! Jy is ingeskryf! Geen inskrywings per e-mail sal aanvaar word nie, want die proses moet so fair en deursigtig as moontlik wees. Die blogkomitee, Wimpie en Platkop (as dit orraait is met jou…) sal optree as die judges, en ons woord is wet. Geen korrespondensie en blah blah blah nie.

O ja: jy kan soveel keer deelneem as wat jy wil. En die kompetisie is van hierdie oomblik af oop en aan die gang! Vertel jou maatjies, vertel jou meisie, vertel jou skelm! Sit ‘n link op jou blog. Vertel die wêreld! Wanneer die uitspeelwedstryde begin, sal die pryse groter en lekkerder raak – ons werk hard daaraan! Nou toe, wat wag jy nog? Wat gaan die uitslag teen Samoa wees?!

PS: Elke wedstryd se kompetisie sluit 5 minute voor die afskop. Suid-Afrikaanse tyd. My TAG werk nie hier in Frankryk nie. En elke keer wat ek huistoe bel, is dit asof ek in die toekoms in praat. Scary…

 

 


Jou whiskey kom in ‘n Boks!

Augustus 22, 2007

Dis altyd lekker om van ‘n vliegtuig af te klim, die aankomssaal van die lughawe in te stap en duisende ondersteuners te groet! Dit maak rugby die moeite werd! Regtig! Tot vandag…

Dit is die verwelkoming wat ons gekry het. Ou Bakkies het sommer dekking geslaan net daar in die lughawe! Hy sê hy was bang vir ‘n sielkundige kopskoot! Onsin, sê ek jou! Maar ek sal nie met hom stry oor goeters soos sielkunde en kopskote nie – hy’s’n plumber, hy behoort te weet. Ek het net daarna gegluur en nogal soos ‘n “Boks” gevoel. Donners…

Maar die whiskey-drinkers van Glasgow is lus vir ons, dis ‘n feit soos ‘n bloeiende Springbok-ram. Die blêddie Nataller het maar redelik bleek gelyk toe hy die groot advertensiebord sien, wat my baie goed pas. Die Bokke het Saterdag ‘n man van staal nodig – ek sal voor opdraf!

Die atmosfeer hier in die kamp is maar nog redelik dik, so ek sal nie vanaand te veel sê nie. Een ding kan julle maar weet: ons SAL reg wees Saterdag. Gister was ‘n moewiese glips – belowe! Ons sal regmaak!

Over an’ out!

Captain Vic

PS: Baie dankie aan al ons gereelde blogbesoekers, sowel as almal wat so gereeld kommentaar los. Uit die aard van my werk as internasionale rugbyheld is dit vir my moeilik om een en elkeen te antwoord, maar ek lees alles en die blogkomitee waardeer julle insette en ondersteuning.

PPS: BobTong sê sorry oor gisteraand. Dit was ‘n oeps, sê hy.

PPPS: ‘n Spesiale woordjie van dank aan Platkop – ons grootste vyand het ons grootste vriend geraak. En daai siek fok Boegie. Mwah!


Victor-tyd

Augustus 21, 2007

Uit-FLIPPEN-eindelik! ‘n Bietjie Victor-tyd…

Game dae is eintlik ‘n bôls-up! Dis foto’s en praatjies en onderhoude en handtekeninge van vroegdag tot laat. En net wanneer jy dink die uitputtende werk is verby, moet jy gaan rugbyspeel! What a waste!

(On)Gelukkig is ek mos nou nie deel van die rugby-sirkus vandag nie, net deel van die Springbok-sirkus. Ek was regtig in die mood om ‘n paar Iere af te knou, en nou moet ek ou omies geselskap hou in die pawiljoen. Nie fair nie! Besef die mense nie ek is ‘n Springbok-kaptein nie!

Die blêddie Nataller kla alweer sy hamstring is seer, maar ek kan sweer hy lieg. Die een dag loop hy kruppel op die een been, die volgende dag houvas hy die ander kant. Iemand sal vir hom moet ‘n prentjie teken of ‘n toutjie aan sy pols vasmaak – hy’s besig om ‘n selfs groter njêrts van homself te maak…

Groot amok gehad laasnag! Bakkies en CJ het besluit om weer ‘n paar middernagtelike versnapperinge te gaan procure by die kombuis, toe CJ (met sy ronde lyfie) oor ‘n vullisdrom struikel en sewehonderd potte en panne agternasleep in sy poging om nie snotboks eerste met die teëls kennis te maak nie.

Hotelsekuriteit was soos ‘n blits op die toneel, en die twee vermeende diewe is met ‘n vrag kos op heterdaad betrap. Coach en Smal Gert is toe nader geroep, en na deeglike beraadslaging is daar besluit die twee koekiediewe moet ALLES wat hulle gesteel het, net daar sit en opeet. (Ek kan net Bakkies se smile picture…!)

Die hele oefening het egter bietjie ge-backfire op die coach en die hotel… Toe Bakkies die derde keer vra of hy nog kan gaan haal, het hulle die straf verdaag. Tot Bakkies se onsteltenis. Hy het brom-brom hier ingestorm en iets gemompel van “as jy iemand wil straf, doen jy dit behoorlik, jy maak nie ‘n jack-ass job daarvan nie…” Ek het eers later agter die kap van die byl gekom, toe ek probeer uitvind hoekom daar niks ham, spek, kaas, piesangs of appels by vanoggens se brêkfis was nie. Ook nie melk en lemoensap nie…

Iemand het vir my hierdie cool prentjie gestuur en gesê al my supporters moet dit in die paal op hulle blogs sit. Ek het laat Bakkies kyk, maar hy sien nie enige pype of pale nie. Nie eens ‘n kraan wat lek of ‘n drein wat verstop is nie. En hy behoort te weet, hy is immers ‘n plumber. As een van julle weet, sit asb vir ons die ligte aan…

Moet sê: nogal ougat, né!

Nou ja, oor ‘n paar minute vertrek die bus stadion toe. Ek het honderd pond gewed dat ons met meer as sestig punte gaan wen, maar met minder as tagtig. Die bookies hier is nogal gaaf. Maar ons vat niks by hulle nie. Ons gee net. Behalwe as ons wen. Dan stuur ons ‘n tas!

Hey, die bus wag! Cheers!

 


Amptelike Bekendstelling

Augustus 19, 2007

Die hel was los vanaand!

Daar sit ons toe almal saam in die team room…  Nadat ons ‘n paar video’s bestudeer het en een van ons Ierse spioene ons ‘n baie lang, boring briefing kom gee het oor die manne van Connacht, vra Jake toe of enigiemand nog iets op die hart het voordat ons verdaag.  Dis gewoonlik die teken dat ons kan gaan eet, en ek moes vir Bakkies aan sy broekrek vashou om nie by die deur uit eetsaal toe te storm nie!

“Ek het nog ‘n laaste puntjie wat ek wil bespreek” sê ek terwyl ek uit my stoel uit rys en keel skoonmaak.  Die hele groep het nogal respek vir my (al moet ek dit nou self sê…), en gaan sit toe dadelik weer.  Net die Nataller hou aan mik vir die deur.  “Dit raak jou ook”, sê ek terwyl ek hom my evil eye gee en na ‘n stoel beduie.

Toe hy uiteindelik sy vet jack op ‘n stoel kry, breek ek die nuus:  “Ek het ‘n blog begin oor my…  oor ons wedervaringe op toer…”

John se “WAT!” en ou Bakkies se “Sjarrap! Hy praat!” was soos een, maar as Bakkies vir jou beduie jy moet sjarrap, dan sjarrap jy.  John Smit of te not!

Ek verduidelik toe vir die ouens mooi  dat ons nou in ‘n tegnologiese eeu is en dat dit ‘n goeie manier is om ons bewonderaars ingelig te hou van hoe dit met ons gaan, en ook vir hulle ‘n bietjie insider info gee oor dinge wat hulle nie altyd op Keo en in Rapport lees nie.

Die ouens het seker gesien uit my evil eye wat ek ou Vettie gegooi het dat my blog nie onderhandelbaar is nie, en almal het ‘n rukkie lank op en af geknik en my toe met gelukwense toegegooi vir my uitstekende visie en vermoë om die behoeftes van ons ondersteuners te identifiseer en stappe te neem om dit te bevredig.

Maar die blêddie Nataller was nog nie tevrede nie.  “Ek is die amptelike kaptein van hierdie span, en as iemand ‘n blog moet hê, dan is dit ek!”  Ou Bakkies het stadig uit sy stoel opgestaan, die wedgy wat ek hom toegedien het uitgetrek, sy skouers gerol en gesê “Twee vrae…” terwyl hy oor die Nataller getoorn het.

“Een:  waar sit ‘n rekenaar aan?  Twee:  Behalwe Jake hier, wie in Suid-Afrika dink nog jy is ‘n kaptein se gat werd?  As jy vraag een reg antwoord, en drie name gee van mense wat nie familie is nie op vraag twee, kan jy die blog kry.  Anders is dit afgehandel.  Antwoord.”

John het daai gebruiklike shmirk op sy gesig gekry (jy weet – soos wanneer hy sestig minute lank gespeel het en dan van die bench af sit ek kyk hoe sy span wen), rondgekyk in die vertrek en gesê “Ek dink ons moet klaarmaak hier, die kos raak koud…”

Settled.  Bakkies het sy broek (en tackle) verder verstel, omgedraai en vir die res gesê “laat een van julle bliksempies net voor my skep…”  En daarmee, liewe vriende, is my blog se bestaansreg geseël.  Dit is met groot vreugde en eer wat ek vanaand kan verklaar dat my blog amptelik die goedkeuring van die hele Springbokspan wegdra.

Ek was so in my noppies, ek het drie van my steaks op ou Bakkies se bord uitgekrap.  Sy gesig het gestraal!  “Dhankhie Thommha” was al wat hy kon uitkry, kieste bol van die vyfsterkos.  Net een ou eet meer gesond as ou Bakkies, en dis Ollie le Roux.  Al verskil is Bakkies se rugby verbeter, terwyl Ollie se hare olierig raak en sy kondisie verbeter.

Tinkerbell (Danie Rossouw) het later na my toe gekom en gevra hy wil so bietjie met my oor die blog-ding gesels.  Hy’t rondgekyk soos iemand wat drugs verkoop.  Erg senuagtig.  “Ou Vics, die blog-ding…  Dit gaan seker nie ALLES inhê van wat hier op toer gebeur nie, huh?  Jy weet, ons is nie almal getroud nie, en …  maar ons wil nou ook nie soos ‘n klomp rokjagters en moegoes lyk nie, OK?”

Ek kon sien uit die angstige klomp oë wat ons dophou dat hy nie net vir homself praat nie, en dat ‘n klomp ouens hulle flair sou verloor as ek die verkeerde antwoord gee.  “What happens on tour, stays on tour” stel ek hom toe gerus.  “Ons sal ‘n komitee stig wat sal bepaal watter juicy bits die blog haal.  Ek, Bakkies en BobTong sal die komitee wees.  Goed so?”  TinkerBell se oë het sommer weer geskitter, en daarmee weet ek het ek ‘n klomp vrese begrawe.  Nou kan die ouens weer begin fokus!

Die blêddie Nataller het nog nie weer met my gepraat nie, maar vandat ons die Super 14 gewen het praat hy in elk geval net met my wanneer ek die lynstaantekens vir hom skree, so dis nou nie asof daar skielik onmin is nie.  Nie dat dit my veel pla nie – hier’s ‘n vliegtuigvrag vol mense in hierdie groep, en hulle praat almal met my!

Ek gaan nou inkruip, maar ons gesels weer more.  Lekker aand!

johnsmit.jpg

PS:  Bakkies het nou net met ‘n kussingsloop vol kos hier ingekom (weer ‘n early eve raid op die kombuis uitgevoer…), en so al kouende aan ‘n kalkoenboud beduie hy het persoonlik ‘n meningsopname onder die ouens (en die dokter-tannie) gemaak, en hulle is 100% happy met die blog.  Bakkies sal weet van meningsopnames (hy’s ‘n plumber), so ek trust hom.  En hy het die kombuissleutels onder my matras ingedruk, so ons sal weer in twee sessies slaap…


Ierland

Augustus 19, 2007

Hallo almal!

Ek kan nou nie eintlik sê ek is ‘n groot fan van Ierland nie. Die mense praat snaaks, die wind is yskoud, die bier is vuurwarm en die room service suig.

Gister toe ons hier land was daar so klein bietjie drama by die lughawe, maar behalwe vir dit dink ek die reëlings verloop sover seepglad. Ons het vanoggend so lui draffie gevat net om die vliegtuig-ry uit ons litte uit te kry. Galway is nogal nie ‘n lelike dorp nie – net bietjie outyds. Ons sal seker vanmiddag ‘n bietjie gaan litte losmaak op een of ander obskure rugbyveldjie.

Intussen het ek en Bakkies besluit om die nuus van my blog vanmiddag in die team room aan die res van die spelers en bestuur oor te dra. Ek wonder nogal wat hulle daaroor te sê gaan hê… John Smit sal seker weer ‘n bekvol hê – hy is altyd ‘n drol in die drinkwater. Moenie verbaas wees as daar binnekort ‘n blog vir hom ook êrens sy verskyning maak nie!

O ja, voor ek vergeet – ons speel Dinsdag teen Connacht. Dit is amper soos ‘n provinsiale span. Seker soos Namibië. Net provinsiaal. Maar nie soos die WP nie. Sterker. Maar ook nie soos die Bulls nie. Swakker. Amper iets soos Boland of die Valke of Griekwas. Bakkies reken ons behoort te wen. Hy sal weet, hy’s ‘n plumber.

Groete!

PS: Hier’s ‘n foto of twee van Galway. Mooi, maar nou nie juis my smaak nie… Ek verkies Pretoria, dankie!

galway_02.jpg

galway_01.jpg